!!أنا والشغل والكلب

أهلا ومرحبا بكل السادة المفقوععين من المسلسل إياه "مغامراتي في إنترفيوهاتي" والحلقة ال19 (عذرا للطول بس مغامرة الكلب تحديدا في الجزء الأخيرمن البوست عشان مطولش عليكم)اللي كنت وعدتكم فيها أني حخصصها لمغامراتي مع الهيئة الكاثوليكية لإغاثة اللاجئين اللي تسلمت العمل فيها في الحلقة الماضية لمدة شهرين فقط بعدما تم قبولي هناك علي طريقة ال
recycle bin
.
(راجع أحداث المغامرة السابقة)..تمت أحداث هذه القصة في الفترة من نوفمبر 2007 حتي يناير 2008
استلمت فعلا الشغل اللي كان عبارة عن مقابلة اللاجئين العراقيين والسودانيين وإنهاء إجراءات صرف المنحة المستحقة لأولادهم اللي في مرحلة التعليم الأساسي لحد الثانوية العامة وده كان بيتم في مقر جمعية أبناء السودان ب6 أكتوبر ومش متذكر المكان فين بالضبط بس كل اللي فاكره بالضبط المشوار المقرف بتاع كل يوم الصبح من أول ركوب الميكروباز من موقف التحرير بطريقة البقاء للأقوي لدرجة أني في يوم من الأيام شفت ست عجوزة منهارة من البكاء عشان بقالها أكثر من نص ساعة مش عارفة تركب بالطريقة دي والشباب بيزقوها
متستغربوش...الحياة ولقمة العيش بقت صعبة أوي..أنا كلت كمية ضرب بسبب المشوار ده تكفيني سنين قدام لأن بيبقي العدد اللي عاوز يركب أضعاف سعة الميكروباز،فبالتالي معظم أوقات ركوبي كانت بطريقة الدفع واللي يحب النبي يزق،فكانت النتيجة كدمات في أماكن مختلفة..ده بس عشان أوصل لست أكتوبر اللي منها بركب ميكروباز تاني ثم يأتي الدور علي التوك توك للذهاب لمقر الجمعية،وهنا حستعرض لكم أبرز المغامرات اللي عملتها وحصلتلي هناك..يعني أم نبيل لا مؤاخذة مش أجدع منهم في حاجة عشان يبقي ليها مغامرات

تغيير المسار بسبب الخوف من الاغتيال-

زي ما انتوا عارفين أن سواقين التوك توك في مصر معظمهم ما بين بلطجية أو سوابق والباقي مسجل خطر..المهم أنا بصراحة مبحبش أحس أن فيه حد بيستعبطني أو عاوز يضربني علي قفايا بالرغم من أن الدنيا كلها معلمة عليا جامد..فبالتالي في أول يوم اتنصب عليا في الأجرة وده عرفته من صديقي في العمل إبراهيم اللي كان شغال معايا في المقر،وبالتلي صممت من تاني يوم أني حتلابط معاهم ومش حخليهم ينصبوا عليا وبالتالي كان كل يوم خناقة مع سواق مختلف علي الأجرة لدرجة أني بقيت محفوظ عندهم في الموقف وواحد منهم رفض يركبني أساسا في مرة
واللي زاد وغطي أنه بعد نهاية الشغل في يوم من الأيام لقيت راجل عراقي من اللي لسه مخلص معاهم مقابلة حيركب توك توك وطالع ع الموقف اللي أنا بروح مه،فركبت معاه ولسه يدوب السواق حينصب عليه رحت متدخل وقلت له متدفعش أكتر من كده..الواد السواق كان علي وشك أنه يشرحني لولا أن الموقف كان زحمة بس قعد يبرطم بشوية كلام خايب بعد ما نزلت
كل ده يهون لحد ما جت الواقعة الكبري..ركبت مع واحد شكله مبرشم وضارب كوكتيل جامد وجيت اديله الأجرة بتاعة كل يوم راح مديهالي خنازيري(مش حوضح أكتر من كده ..شوفوا أنتوا بقي صوت الخنازير ازاي)..فرديت عليه بالنداء الشعبي الشهير((أبو 3 حروف ده)..الموضوع سخن قاللي مش حأخدهم
قلتله بكل برود:أحسن ..أمال عاوز كام
قاللي مش أقل من 5 جنيه
قلتله..مش تقول كده من الأول..طب خد(مشهد محذوف من الرقابة)..ورحت ناطط بسرعة ناحية الجمعية للإحتماء بالأشقاء السودانيين إذ ما إستدعت الحاجة والحمد لله الواد طلع بالتوك توك بدل ما ينزل يشرحني وهو عمال بيسب فيا
ولما حكيت هناك للجماعة السودانيين ..قالولي والله لو كان حاول يعمل حاجة كنا قطعناه(ناس جدعان أوي والله) بس نصحوني أغير وجهتي من تاني يوم لان كده أنا ممكن أتعجن في موقف التكاتك تاني يوم بعد ما بيني وبين كل توك توك تار بايت،وبالفعل غيرت مساري تاني يوم وبقيت أركب ميكروباز تالت بس بينزلني بعيد عن الجمعية وبضطر أمشي مسافة محترمة وسط أكوام قذرة من الزبالة،وبما أن عندي وسواس نظافة بشكل غبي،فعدنا للتوك توك بعد أسبوع من الواقعة إيهاها وربنا سترها في المدة المتبقية

تموت مخنوق ولا مزنوق..العبارة في الشطافة؟-

هل الوسواس ممكن يقضي علي صاحبه..اه ممكن جدا
في يوم من الأيام كنت مزنوق علي اخري،وبمجرد ما دخلت الحمام اللي في الجمعية خرجت منه ورفضت أتصرف فيه تماما لحالته المتردية جدا جدا رغم نصائح صديقي العزيز إبراهيم أني أخلص وأواجه الموقف بواقعية لأن كده خطر بس تقولوا إيه..طبع وغالب..المهم الحوار شد علي اخره وبدأت أحس أني بطني خلاص بتتقطع وأني عامل زي الأنبوبة اللي مليانة علي الاخر وفي نفس الوقت خايف أنفس(الناس مالهاش ذنب برضه..نياهههه)..حل إبراهيم المشكلة وسابني أروح بدري حبتين بعدما كان الشغل أوشك علي الإنتهاء،وبسرعة جريت علي أقرب توك توك ثم ميكروباز ثم أتوبيس ثم تاكسي والحمد لله يوميها بالإضافة لإصلاحات المحور المعتادة كان فيه حد معدي وجنازة واحد مهم في عمر مكرم،فبالتالي عملت رقم قياسي ووصلت بيتنا في وسط البلد في أربع ساعات الا ربع..اه والله ..يعني إسكندرية رايح جاي..يا ريتني كنت روحت لعمي هناك واتصرفت عنده طالما الحكاية كده
روحت البيت وبمجرد ما الباب اتفتح جريت علي الحمام لعزف أطول وأصعب سيمفونية في حياتي

الاجازة في البزازة-

المفروض شغلنا كان بيتم علي سيستم كومبيوتر معين زي اللي موجود عندهم في قسم المطرية الرئيسي ولكن لم يتواجد هذا الكومبيوتر الي وعدونا بحضوره إلي 6 أكتوبر من تاني أو ثالث أسبوع بالكتير،وعشان كده في أول أسبوع خدونا يوم للمطرية لتخليص الأوراق اليدوية اللي عملناها وإدخالها للكومبيوتر هناك والحمد لله لقطت السيستم المرة دي بسرعة بخلاف ما حدث في أم نبيل
وقدرت أخلص هناك أول واحد كمية الأوراق بتاعتي وبالتالي مشيت وسيبتهم بايتيين هناك لحد العاشرة مساء..معلش أصلي مبحبش نظام البيات في الشغل ده فبالتالي مش بضيع ثانية واحدة في أي حاجة بره الشغل من ساعة حضوري
من أول يوم وأنا متفق معاهم أن الأجازة يومي الجمعة والسبت وحيث أن مشوارهم منيل بستين نيلة وهما كلهم شهرين عمي،فأنا تمسكت بنص الإتفاق حرفيا لما طلبوا مني النزول في إحدي أيام الجمعة للمطرية لتخليص أوراق الأسبوع في 6 أكتوبر..أنا قلت أطنشهم وكده كده البيه الكومبيونر حيرف ولكن مر الأسبوع الثاني والثالث ولم يحضر الكومبيوتر وتكرر نفس الموقف وعملت نفس رد الفعل(هما كمان حيخنصروا في الاجازة) ومن هنا جاءت بداية التوتر في العلاقات،فصممت علي الكومبيوتر اللي يخلينا نخلص كل شغل بيومه..يعني أنا مش طول الأسبوع أقعد شغال يدوي وأنجز شغلي وفي الاخر يقولولي أنزل في يوم الاجازة للمطرية..يا أخي
***
ثم جاء الكومبيوتر..وفرحت وقلت خلاص ربنا يعدي الثلاث أسابيع اللي فاضلين علي خير..ولكن يا ريييته ما جه
الاساتذة جابولنا كومبيوتر مش عليه السيستم أصلا..يعني سد خانة من الاخر ويوم ما جه مهندس وشغله..السيستم كان بيقع كل عشر دقائق
حاولنا أنا وإبراهيم نخمس في الكومبيوتر ومنفعش فرجعنا لليدوي من تاني لحد ما في إحدي الأيام المزدحمة خلصت وفوجئت بدخول واحدة من الهيئة عليا وبتقولي أنا جاية أخدك مخصوص عشان تروح المطرية تدخل شغل الأيام اللي فاتت كلها ع الكومبيوتر..حتة موقف..كده مش حعرف أفلفص زي ما كنت بعمل معاهم أيام الجمعة..ومن هنا جاءت واقعة الكلب

!!كلب جربان..وعم صليب الضمان-

في مقر المطرية لما رحت أول مرة،كان فيه هناك كلب عملاق وجربان،الأطفال السودانيين اللاجئين كانوا بيحبوا يلعبوا معاه ويجروه وراهم..وأنا أصلا عندي عقدة قديمة من الكلاب الكبيرة لأن كانت حياتي زمااااان حتنتهي بين أنياب دوبرمان لولا أن صاحبه شده من فوقي في اللحظة الأخيرة ،ومن ساعتها لما أشوف كلب كبير في الشارع لازم ببعد عنه بمنتهي الحرص عشان الأدريالين ميفضحنيش،وهو ما تكرر في أول مرة مطرية واللي نفعني فيها أن الدنيا نهار وشايف فيها موقع الكلب الجربان،ولكن في المرة الثانية خدوني من 6 أكتوبر وعقبال ما وصلت هناك كانت الدنيا ضلمة كحل ومش شايف قدامي بصراحة من المشوار الزبالة بتاع 6 أكتوبر واللي زاد وغطي أني سالت الهانم اللي جت خطفتني من 6 أكتوبر علي المرتب،تهربت من الإجابة بشكل مريب عصبني جدا وخلي وساويسي تشتغل لان كان فات عليا هناك ما يقرب من شهر ونصف دون تقاضي مليما واحدا،وبما أني مش ماضي أي ورقة أو عقد هناك يفيد أني حشتغل شهرين،فجاء شوشو ليلعب بعقلي أني كده حتأكل علي قفايا وممكن يتنصب عليا..أوباااااااااا
يعني مش كفاية خطفوني بعد ما خلصت شغلي في أكتوبر عشان أروح أعمل شغل أسبوع بحاله في المطرية..لأ وكمان فيه كلب هناك والدنيا ظلام جوه المقر ومفيش حتي لمبة جاز أشوف بيها لحد ما أوصل المكتب،فتملكتني رغبة في الإنتقام مقدرتش أسيطر عليها وهي واحدة بواحدة والبادي أظلم
بمجرد ما جيت أفتح باب المقر في الظلام الدامس،انطلقت أبواق الهوهو من الكلب،رحت قافل الباب بسرعة وقلت والله ما أنا داخل غير لما يطلعلي حد من جوه يأمنلي السكة،وبالفعل قعدت أصرخ في الشارع
يا ريمووووووووووووووون..يا ريموووووووووووون
الناس بدأت تتلم حواليا..فيه إيه يا ابني
أنا:لأ بسيطة أنا عاوز حد يجي يفتحلي الباب عشان الكلب اللي هناك ممكن يمسك فيا
مواطن:متخفش يا ابني..ده كلب طيب خالص ومش مؤذي
أنا:والله أنا معرفوش قبل كده عشان أحكم عليه إذا كان طيب ولا لأ
وبعد سلسلة من النباح المتواصل بيني وبين الكلب اللي جوه..طلعتلي رضوي وماريان وفي إيداهم كشاف نور عشان يفتحولي الباب وأقدر أعدي وأنا شايف موقع الكلب(امنعوا الضوحك)..ولم تنتهي المأساة عند هذا الحد بل عرفت من رضوي وماريان أنهم مروحيين دلوقتي وأن فيه ورق تاني مستنيني في المقر غير اللي مروح بيه من أكتوبر وأن الكشاف اللي نورولي بيه ده جابوه من عم صليب حارس العقار اللي حيروح بعد نص ساعة فقط
ابسمت لهم وقلتلهم:ربنا يطمنكوا يا بنات..يعني النهاردة ممكن تبقي نهايتي علي إيد كلب
دخلت جوه ولقيت أكوام ورق..وبحسبة بسيطة أدركت أني مش حقدر أنتهي من الكلام ده قبل الساعة 11 باليل علي أقل تقدير
وبما أن شيطاني اسمه الفلوس اللي أنا مقبضتهاش ومش عارف حقبضها امتي وبما أني مضطر للتعامل مع الكلب الجربان بمفردي،فاتخدت القرار الاتي
قرار رئيس الجمهورية بتلبيس الهيئة الكاثوليكية في مشكلة خازوقية مايكلية
ححححححححححححححححححححححح(صوت الجماهير)محدش يفهم غلط
أيوة قلت حشتغل لمدة نص ساعة فقط واللي يخلص يخلص بس أضمن أني أروح في حماية عم صليب لأن المنطلقة مقطوعة ولو الكلب خبطت فيه في الظلام الدامس..محدش حينفعني بحاجة وفي نفس الوقت أبقي رديت الصاع صاعين لهم
وفعلا تمر النصف ساعة ثم أبدا في الهتاف:يا عم صلييييييييييب يا عم صليييييييييييب
حضر الرجل مهرولا لمعرفة الحكاية قبل ما يروح..قلتله أنا خلصت كده شغلي وعاوزك بس معايا لحد ما أخرج من الباب عشان عندي عقدة من الكلاب
سألني عم صليب:أنت بتصلي وتروح كنيسة؟
قلت : بس كده قشطة ..طالما هو من الناس اللي بتسأل السؤال ده..يبقي أخشله من سكة الدين عشان أصعب عليه
فقلت:لأ يا عم صليب..وهو ده اللي مخليني حاسس أن ربنا ممكن يسيب الكلب عليا النهاردة..أنا عملت ذنوب كتيير ونفسي أتوب
الراجل تعاطف معايا جدا وقعد يديني مواعز ويقولي أني لازم أسيب البنات اللي ماشي معاهم وكلام من ده
بصراحة أنا كنت حايش الضحكة بالعافية..يعني بالذمة هو أنا شكلي ممكن يدي علي زير نساء؟؟
المهم جاب عم صليب الكشاف وخرجت في حمايته رغم أنف الكلب اللعين والراجل كمل الموعظة معايا في الشارع لمدة نص ساعة وأخد نمرتي وأخدت نمرته
طبعا ..بعد الحركة دي ..الموقف اتكهرب بيني وبين الست اللي جت خطفتني من هناك وحصلت مكالمة فيها تراشق بالألفاظ بعدها بيومين لاني لبستهم في حيطة
بس والله لما عرضت الموقف علي مديرة أكبر منها..الست تفهمت الموضوع خصوصا أني مش بمشي من 6 أكتوبر غير وأنا مخلص كل شغلي والناس اللائجين اللي هناك بيحبوني ويحترموني جدا وبقدر أتعامل معاهم كويس وأخلصلهم أمورهم مع زميلي إبراهيم
وبعد سلسلة من المناوشات والمناورات حول المرتب،عرفت أني مكنتش حأخد مليم واحد منهم لأن مفيش ورقة تثبت ذلك وأن المسئول عن كده الهانم اللي جت خطفتني
ولم يتدخل لحل الموضوع سوي المديرة الكبيرة اللي كانت ست في قمة الإحترام وحصلت علي مرتبي بتاع الشهرين في نهاية المدة اللي خلصت قبل اوانها بعشرة ايام
ورحت اشتريت بالفلوس جهاز بلاي ستيشن 2..هع هع هع
وفي النهاية فيه كلمة لازم أقولها:شكرا شكرا يا سارة..لأن لولا تدخلك مكنتش حشتغل الشهرين دول وأجيب بلاي ستاشن 2
شكرا شكرا يا هوما(إبراهيم) لانك بجد حد جدع مبسوط أني اتعرفت عليه هناك

نلتقي في البوست القادم مع الألبون السابع
يا بووووووووووي يا مصر