!!إنترفيو السيفون

أهلا بكم..وعودة جديدة مع مسلسلكم المفضل"مغامراتي في إنترفيوهاتي"..والحلقة ال39 واللي طبعا كلكوا مستغربين من عنوانها بس أهي فرصة(نشد) بقى على موضوع أحداث مباراة الخرطوم ونسيب(المزنوقين) بتوعنا يشوفواشغلهم فيها يمكن (يريحونا) في الاخر ويخلوا كل واحد فينا مش حي(كوز) حاجة تاني..ودلوقتي اتفضلوا معانا نشوف المغامرة..وشافاكم الله وعافاكم مقدما
تمت أحداث هذه المغامرة عام 2007
مكالمة صباحية لسيادة العميد ع الساعة 9 تفيد بسرعة التوجه لشركة.......الكائنة بشارع سوريا في الباشمهندسين التي تمثل منطقة النفوذ الإنترفيوهية بالنسبة لي..بفكر أستقل بها وأعملها عاصمة الإنترفيوهات
الناس حددوا لي ميعاد ع الساعة 11 فكان لازم أجهز..قمت طشيت وشي في الحوض وبعديها دخلت عزفت سيمفونية في بيت الراحة(نتيجة وجود تقلصات شديدة في الليلة اللي قبليها) وبعدها خدت دش ساخن وفطرت بالبوريو بتاعي(حد عنده إعتراض) ونزلت ع الميعاد من قبل ما ألحق أفتح النت وأشوف أي معلومات عن الشركة دي
وبدأت رحلتي المعتادة بالحشر في المترو من محطة محمد نجيب للدقي وبعدها التاكسي ثم الخناقة ع الأجرة ثم السماع لفتاوي المارة وعابري السبيل من أجل الوصول للمكان المنشود، وبما أني بقيت حافظ المهندسين أكتر من وسط البلد(بسبب إنترفيوهاتي هناك)، فمخدش وقت طويل
ووصلت الشركة قبل ميعادي بعشر دقائق ولاحظت أنها رغم حجمها المتوسط إلا أنها نظيفة جدا وطالعة منها ريحة حلوة جدا شبه ريحة الفنيك كده.
والله الواحد قال يا ريت يلطعوني بره شوية قبل الدخول على اساس أن الريحة دي تفوق الواحد شويتين
ولكن مفيش 5 دقائق ودخلت للإنترفيو أمام مدير في الأربعينات من عمره بدأ معايا بالأسئلة التقليدية اللي حفظتوها عن دراستي وكليتي ومميزاتك وعيوبك والسؤال المميز أوي بتاع كلمني عن نفسك يا مايكل
والله يا جماعة بحس ساعتها فعلا أني مش رايح لشغل..لأ ده أنا قاعد في الصالون وجاي أخطب وفي إيديا حتة الكيكة وكوباية الشاي،ولو المدير رخم بشوفه قدامي سراج منير كمان!!
المهم وصلنا لمرحلة المطبات الصعبة لما الراجل سألني: سمعت عن الشركة بتاعتنا قبل كده
قلتله: لأ بصراحة
قاللي: طب ما بصتش علينا مثلا في الجوجل أو الياهو سيرش
قلتله: بصراحة ملحقتش..يدوب صحيت على مكالمة الإنترفيو وخدت دش وحلقت ونزلت..بس هو العادي بتاعي اني بعرف المكان اللي رايحله
الرجل قاللي:أنا محترم صراحتك بس عاوزك تخمن كده احنا ممكن نكون شغالين في إيه
أنا بصراحة إندهشت أوي لموضوع خمن ده..هو احنا جاين نحل كلمات مقاطعة..ده مش ناقص غير أنه يعمل زي ماما سامية ويقولي عروستي
قلتله:إستيراد وتصدير(شغل أفلام عربي بقى)
قاللي: لأ..فكر شوية
اللهم طولك يا روح..هي الناس دي حتطلع في الاخر شغالة في الرقيق الأبيض ولا تجارة الأعضاء..انا بدات أقلق لحسن ألاقي البوليس كبس على المكان
المهم بعد فاصل سخيف في تخمين نشاط الشركة، الراجل لقيته بيقولي وعليه علامات الخجل:
احنا بنشتغل في الحمامات ومعدات الحمام وبالأخص السيفون وأحيانا الكابينيه..واحنا شركتنا عالمية وليها فروع في دول كتير
أنا(في سري): تصدق أنك راجل هايف وتافه..يعني هي دي اللي مكسوف تقولها..الحمد لله أني تأكدت أنه فيه على سطح البسيطة من هو أهيف مني..مدير ايه ده بس؟؟
ابتسمت إبتسامة خفيفة وقلتله: عادي مفيش مشكلة في كده..ما كلنا لا نستغنى عن بيت الراحة
الرجل ضحك والقعدة بدأت (تفك) شوية وقاللي: مشفتش اللوجو بتاعنا على أي إعلان قبل كده؟
قلتله: بصراحة لأ..كل اللي فاكره في إعلانات الحمامات هو إعلان جرافينا اللي كان بيجي زمان في التليفزيون
الراجل قاللي: مش فاكره يا مايكل
رحت قايم بالواجب وقلتله: بتاع الست اللي بتطلع تدي المواطن بوسة في نهاية الإعلان بعد ما بتنسف حمامها القديم
معلش يا جماعة..هي طلعت مني كده ولكن رد فعل الراجل كان صعب جدا لأنه ببساطة كان بيشرب مياه وشرق وكان حيفطس وأشيل ذنبه
وبعد ما الراجل فاق وخد نفسه قاللي: أنت ليه سبت الكول سنتر في أم نبيل؟
فقلتله: بصراحة معرفتش ألاقي نفسي في الكارير ده وحسيت أني حفضل طول عمري أرد ع العملاء هناك ومش حتطور
الراجل قاللي:أنا ملتمس لك العذر..اللي أعرفه ان فعلا فيه ناس كتير مش بتكمل في الوظيفة دي في ام نبيل
قلتله:اه..وكمان العملاء هناك صعبين أوي
قاللي: ما تحكيلي شوية مواقف صعبة مريت بها مع العملاء هناك
وبعدين بقى في الراجل ده..ما انا خايف احكيله حاجة من إياهم..يفطس في إيدي ..واضح ان غدد الزغزغة عنده نشيطة جدا
أنا يدوب حكيت له حكاية الراجل اللي بيتخانق معايا على رنة الجاموسة والست اللي طلبت مني رنة إسلامي على ذوقي (رغم أنه مش من إختصاصي أنزلها رنات أي كانت)، الراجل بدأ يتشنج ع الكرسي وقاللي: كفاية كفاية
شكله كده ضارب كمية برشام مختلفة ع الصبح وعامل أحلى إصطباحة
ولما فاق من تشنجاته، قاللي: لا تقلق يا مايكل..احنا الوظيفة اللي عندنا خدمة عملاء بس فكر جديد
أنا(في سري): فكر جديد..أوعى تكون منهم ياض
الرجل فهمني الفكر الجديد أني مش برد على عملاء كتير وشغلي الأساسي معتمد على الإيميلات وشغل وورد وإيكسيل وأوت لوك وحاجات من دي..ومعظم العملاء أجانب
وبعد شوية دردشة، قاللي الجملة إياها حنكلمك كمان أسبوعين عشان تعمل إنترفيو مع مستر.....اللي هو المدير الكبير
وخلاص لسه حقوم وأسلم ع الراجل بعد الجملة الشهيرة دي اللي بيزحلقوني بيها، لقيته فجأة بيقولي: استنى
خيييييير..هما الأسبوعين عدوا بسرعة كده
استنى يا مايكل..عاوزك تأخد الورقة دي بالبيانات اللي فيها وتعملهالي ع الإيكسيل
أنا: أوكيه
وطلعت بره وقعدت على كومبيوتر بعد ما خليت السيد الموظف اللي قاعد عليه يقوم
ولكن واحسرتاه..كل شيء إنكشف وبان
الإيكسيل اللي كنت اتعلمته في كورس في أغسطس 2005 طار يا حبيبي طار وأكلته العتة من كتر ركنته في دماغي اللي هي أساسا فيها نص ضارب(راجعوا الحلقة 14)
http://strugglingmichealitoo.blogspot.com/2009/06/blog-post_07.html
بعد محاولات استمرت حوالي 20 دقيقة معرفتش أعمل غير جزء بسيط هو اللي افتكرت فيه كيفية التصرف مع هذا الإيكسيل
طبعا رحت للراجل المدير وسلمت عليه ولكن المفاجأة لقيته بيقولي: خلاص حنكلمك كمان أسبوعين
ده إيه البواخة دي ..ما خلاص حفظناها يا شاطر وبعدين طالما أنا عكيت في الإيكسيل يبقى مفيش داعي تخدعني..هي العالم دي واخدة الكلمة دي لبانة في بقها
أهو يا جماعة فات سنتين و شدينا السيفون على الإنترفيو ومسمعتش فيهم صوته
سمعت طشششششششششششش وبس
ده صوت السيفون..لا تقلقوا
:نلتقي في الحلقة القادمة مع الألبون ال11
صحتين وعافية

الوهم(الحلم) العربي..معالجة جديدة للأوبريت

المرة دي فاصل إعلاني من الإنترفيوهات وأقدم لكم أوبريت الوهم العربي(الحلم العربي سابقا) اللي كتبته منذ أكثر من شهرين..وده عشان محدش بس يربط بينه وبين الحرب الدائرة حاليا بين مصر والجزائر
ملحوظة هامة قبل قراءة الأوبريت: لست بناصري ولا بتاع قومية عربية ولا أؤمن بأي إيديولجية سياسية..فقط مايكليزم..هع هع هع
الأوبريت ليس أكثر من وجهة نظر شخصية في طريقة تفكير الشعوب والأنظمة العربية وهو ما يطرح سؤال داخل المضمون: هل تستحق الشعوب العربية هذه الأنظمة فعلا؟؟
اتفضلوا معانا ويا ريت تختاروا أكثر مقطع حيعجبكوا

أجيال ورا أجيال كاتمين علي قلبنا
واللي نشوفه اليوم مأسوف علي عمرنا
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا
الظلم وهو فظيع..دايما بيصاحبه صراخ
والويل لو صار كئيب..لازم نسمعله صياح
ُكل أنت اللي بيكفيك..لو فرخة ولا ديك
حاول تهضم بالبورجر..بيبسي وكوكا تغديك
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا
عرف زمانك من تكون..ابقي بغرورك اتفلق
اركب لجنابك عيون..تبهر بها من جه بعد
إتحدي الكون واتنمرد..واتعلم تبقي غتيت
مشوار نجم الجيل..شعرة بتطلع بقميص
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا
لساك العقل ف ضلمة..غلبان قادر تخفيه
ولا عمر بقمة وجلسة..حد بيرجع أراضيه
والذل يا ناره يا تاره..ادوني بس أمارة
من بين طواغيت العالم..حكام قلوبها حجارة
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا
من كل شعوب الأرض..شفنا كل الأمراض
جيبتولنا الخوف والضغط..بنقول كفاياكوا عناد
اتمسوا بكل أمان..استنوا مصير صدام
الحق الحب الخير..دوستوها في كل زمان
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا
وعلينا غنوا وقولوا..السلم ده طوق ونجاة
م الوهم بنخلق كدبة..وبألف طريق شفناه
شفتوا الوحدة العربية..تتقال وتعدي في ثانية
جايز من بعد سنين..تطلع نفس الأغنية
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا
خلي الأغاني جريئة..خلي وقتك سراب
كل المزز جميلة..بحلق انسي اللي فات
والبلوة في كل حدود..ومكانها جوه العقل
ومدام شايفين حنغمي..ومدام عاجزين حنًخ
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا
والنصر ماهوش بالكلمة..بالفعل وبالإحساس
لوجي بغنوة وكلمة..حتتوه في طريق الناس
حلمنا وفي كل زمان..نسمع أحلي الرنات
كل النغمات حتكون..من روبي وهيفا كمان
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا
وقتك ضايع في الفرجة..وإزاي حتروح تلاقيه
غنًي ع الناس والسلطة..وحتبقي بكره وزير
وف كاس العالم غنوا..واختصره سنين بثواني
عمل المفعول بذكائه..وفضلنا برضه نعاني
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا
الغنوة وكانت حلوة..دلوقتي بقت ذكري
ومدام بنفك ونخلع..راح نحلم برضه لبكره
نتمني الحلم يكون..وما يصبح برضه كابوس
ما مسير العك حيخلص..ما تفوقوا علينا اللوم
جايز نشوف الويل يقرفنا طول السنة
نفضل بروح التور ننطح لأبعد مدي
ده ذنبنا طول عمرنا أمريكا تلبنا كلنا كلنا

!!إنترفيو السيارات..وإستعادة الذكريات

أهلا بكم والحلقة ال38 من مسلسل مغامراتي في إنترفيوهاتي ولنأخذ فاصلا من متابعة الصراعات الدموية المصرية الجزائرية لأن كله بقى في المهلبية وتعالوا نشوف حكايتي مع العربية
تمت أحداث هذه المغامرة في يوليو 2005
يا ترى ممكن تقابل يوما ما إنترفيو لذيذ تستعيد فيه شريط ذكرياتك وف الاخر برضه ما تنولش مرادك؟
تعالوا نشوف الحكاية
بدأت القصة بمكالمة من إحدى شركات السيارات (لا أذكر إسمها بس هي كانت في أرض اللوا) بتحديد موعد لإجراء إنترفيو على وظيفة مندوب مبيعات
طبعا في وقتها أنا لا كنت عميد ولا حاجة..كنت لسه يدوب حاصول اللي عوده أخضر ولسه جاي من بلدهم..يعني يمكن يكون ده كان من أول 5 إنترفيوهات ليا في تاريخي الطويل.
وصلت هناك حسب الميعاد ودخلت على الموارد البشرية وإستقبلني شاب في مقتبل الثلاثينات وبصراحة كان من النوع اللي وشه بشوش جدا وده شيء مريح في حد ذاته لأني ياما قابلت ناس وشها زي البومة لدرجة أني كنت بحس أن اللي قدامي خلاص عاوز يرجع عليا.
الولد سألني في البداية: المشوار كان سهل ولا لأ
قلتله: مش أوي..بس عموما اللي يسأل ميتهوش واديني برضه وصلت رغم أن العنوان اتوصفلي بكذا طريقة في الشارع
هو: أهلا بيك في وطنك
أنا( في سري): ده إيه الشاب الكوول ده..خير خير
مسك السي في بتاعي وقعد يقرأ فيه وطبعا مكنتش ساعتها إشتغلت في أي مكان لأني يدوب متخرج من شهر
هو: ليه الإيميل بتاعك إسمه زيروكس؟
أنا: دي ليها قصة مرتبطة بأيام الكلية
هو: طب احكيلي
أنا: أبدا.أصلي كنت مصدر الورق الأول في الدفعة وكان كله بيجي يصور مني فطلع إسم زيروكس للشهرة الواسعة، فعملته إيميل
هو: ده أنت شاطر أهو..طب كنت بتبيع الورق للمكتبات اللي بره الجامعة
أنا: لأ أبدا..أهو كان زمايلي والناس اللي في الدفعة بيصوروه مني والمكتبات اللي بره كان بيوصلها للأسف ويبيعوه كمان
هو: معلش كلنا بنأخد مقالب أيام الكلية بس أنت ليه عامل بحث التخرج بتاعك عن حقوق المرأة..هي ناقصة يا راجل..ما كفاية ماما سوزي مهتمة بيهم..المفروض تعمله علينا إحنا
أنا (مبستما): لأ ..صدقني لسه المرأة عندنا بتتظلم في حاجات كتير حتى لو خدت جزء من حقوقها نظريا في بعض المجالات بس كفاية أن نظرة المجتمع من جواه لسه متغيرتش
هو: يا راجل أنت بتصدق الكلام ده برضه
ساعتها بصيت على إيده ولقيت دبلة الجواز وقلت في سري: تلاقيه واخدله شبشبين قبل ما ينزل شغله
أنا: بصراحة اه
هو: طب ولما عملت بحثك لقيت مين أكتر ناس أدت المرأة حقها في الدول العربية
أنا : الإجابة تونس
هو: طب جميل..أنا شايف أنك كاتب في السي في أن الرياضة من هواياتك..بتلعب رياضة
أنا: لأ..بس متابع جيد جدا
هو: بتشجع مين
أنا: الأهلي
هو: أجدع ناس وإيه رأيك في الأهلي السنة دي
أنا: جوزيه مدرب ممتاز وعندنا فريق كويس أوي وأنا واثق أننا حنأخد الدوري السنة الجاية وبدون هزيمة زي السنة دي بس ممكن نتعادل أكتر(وقد حدث بالفعل في الموسم التالي)..المهم نأخد بطولة إفريقيا ونروح اليابان
بصراحة كانت وخداني الجلالة أوي و حنسى نفسي وأقضي الإنترفيو كورة كأني قاعد في استوديو تحليل من إياهم..ما هم بقوا أكتر من معامل التحليل في البلد..يعني مكنش ناقصني غير كوبايتين المياه قدامي واديها تحليل
هو: واضح أنك ليك في الكورة أوي وفاهم
أنا: متابعها من زمااااااااان
هو:بتتفرج على إيه تاني في التليفزيون
أنا: لأ..بطلت تقريبا..حتى الدش زهقت من قنوات الكليبات..يعني بفتح قنوات الرياضة وقت الماتشات المهمة وممكن أشوفلي كام فيلم وخلاص..زمان كنت بتفرج ع التليفزيون أكتر
هو: برامج الأطفال يعني؟
أنا: أيوة..كنت أصحالها بدري مخصوص وأزعل لو فاتتني حلقة
هو: كنت بتشوف إيه..مازنجر وكابتن ماجد والحاجات دي
أنا: أيوة دول كانوا المفضلين بالنسبة لي
هو: بس كابتن ماجد ده تعبان يا راجل..يقعد يشوط الكورة في حلقتين وتخش الجون في الحلقة الثالثة
أنا: لأ..ما هو أنا كنت بشجع ضده في كل ماتش وكنت أحب مازن وياسين جدا
إيه الإنترفيو العجيب ده..فاضلي شوية وحغني معاه زي سرحان بعد البصير وعمر الحريري" أنا ناجح في الثانوية..عقبال الإبتدائية"
قعدنا على كده يجي 20 دقيقة محستش بهم وده لأني بأنسى نفسي في حواديت العيال
وأخيرا: بدأ الإنترفيو اللي بجد بعد ما كنت هيست تهيييس غير طبيعي مع الراجل لدرجة أن وشنا إحمر من الضحك..شكله كان عامل إصطباحة عالية(بعد الشبشب طبعا)
سألني على التدريب اللي أخدته في مركز الأهرام وفهمته أنه كان مجرد محاضرات سياسية وبنتناقش فيها مع الدكاترة
هو: يعني فيها شهادة لزوم السي في وكده
أنا: بصراحة اه..مش حغشك يعني
هو: والله أنت راجل دوغري
أنا: وأنت أحسن واحد عملت معاه إنترفيوهات لحد دلوقتي..نياهههههههههه
هو: معاك رخضة؟
أنا: رخصة إيه( سؤال غبي جدا مني ولكن متوقع في ظل هيستريا الضحك)
هو: رخصة سلاح
أنا:(فطسان من الضحك): ااااااااه.رخصة قيادة..لأ..مش معايا عشان مش بعرف أسوق ومعنديش عربية
هو: طب بتعرف تركن العربية
أنا: لأ ولا دي كمان
هو: مممم..طب بص أنا حبيتك بصراحة وادينا قعدنا مع بعض قعدة لذيذة..وبصراحة عاوزك تأخد الشغلانة
المرتب هنا بيبقى حوالي -1500-2000 وليك نسبة حوالي 0.01% من بيع العربية..احنا لسه حنشوف ناس تانية عموما في الكام يوم الجايين وحكلمك أكيد كمان أسبوعين أقولك النتيجة في جميع الأحوال
ومرت 4 سنوات ونصف على الإنترفيو..وظل العميد عاطلا في بيت أبوه
نلتقي في الحلقة القادمة مع:
إنترفيو السيفون

!! إنترفيو ع البوسطة

أهلا بكم والحلقة ال37 من مسلسل مغامراتي في إنترفيوهاتي والممتد بنجاح ساحق منذ 2005 ويدينا طولة العمر كده وننافس المسرحية الشهيرة وأبقى "الواد مايكل الشغال"..امين
تمت أحداث هذه المغامرة عام 2008
يا ترى ممكن يبقى فيه إنترفيو في صندوق البوسطة؟..تعالوا نشوف الحكاية
بدأ الموضوع لما جاتلي مكالمة من شركة معروفة في مجال التأمين بعمارات الرامو في مدينة نصر تابعة لبنك شهير..عروستي
قلت يا أهلا يا أهلا بريحة الحبايب..أصلي بعيد عنكم كان لي موقف مهبب مع البنك ده في بدايات 2006
ايييييييه..دنيا عاملة زي الخيارة فعلا
قاللولي :يا مايكل عندك إنترفيو يوم كذا الساعة كذا
فسألتهم :حيكون على وظيفة إيه
سألوني: فكرنا أنت مؤهلك إيه
قلتلهم: سياسة وإقتصاد وتخصص فرعي إدارة موارد بشرية
قالولي: تبقى الوظيفة في الموارد البشرية
شفتوا سهلة إزاي..هع هع
لبسنا القميص أبو كرافتة ورحنا على هناك وكلي أمل أن الإنترفيو ده يبقى الأخير وارتاح بقى زي بقية الخلق
ووصل العميد في ميعاده وداخل بكل ثقة ومش ناقصه غير السجادة الحمرا يعني عشان الإستقبال يبقى رسمي فهمي نظمي..ومايكي لو تحبي
وبعد فاصل غير قصير من الإنتظار وملء الإستمارة المعتادة، دخلنا ع الإنترفيو أمام شاب في الثلاثينات من عمره
طبعا الإنترفيو بدأ بالأسئلة الروتينية المعتادة اللي الواحد حفظها عن ظهر قلب لدرجة أني بقيت بردد الإجابات وأكررها كما لو كنت سوفت وير مبرمجة لحد ما جينا لنقطة الخبرة في الوظائف السابقة اللي الراجل أبدى إندهاشه منها لأني خريج 2005 وبالرغم من كده كل الخبرة الموجودة شهرين في أم نبيل وشهر تدريب في الوكالة وشهرين مؤقت في هيئة الإغاثة وكل ده في 3 سنين كاملة
معذور يا جماعة برضه..ميعرفش أني مقضيها إنترفيوهات وبس
المهم..الراجل بيسألني طبعا أنت عارف أن الشغلانة في المبيعات sales
طبعا أنا تنحت من المفاجأة لأني نازل من بيتنا على أساس أنها الموارد البشرية اللي بفهم فيها + مقاطعتي نوهائيا لإنترفيوهات المبيعات لأني ماليش فيها من الاخر بدليل موقف الكوباية الشهير ومن بعده الأخ جوزيف
راجعوا الحلقة 20 و31 لمزيد من التفاصيل
http://strugglingmichealitoo.blogspot.com/2009/07/blog-post_22.html
http://strugglingmichealitoo.blogspot.com/2009/09/blog-post_28.html
قلت أنا أكمل الإنترفيو وأعمل اللي عليا وخلاص على أمل أن طبيعة الوظيفة دي تطلع مختلفة شوية عن بتوع الإنترفيوهات اللي فاتت.
وفعلا تعاملت مع الموقف بهدوء وكنت راضي جدا عن أدائي في الإنترفيو..وحسيت أن الراجل ده شكله يدي على محترم، وهو مشكورا قعد شرحلي شوية في نظام الشركة بتاعتهم والمفروض هما بيستفيدوا ببتوع المبيعات إزاي بس قعد يكرر جملة" أنت إزاي مشتغلتش لحد دلوقتي"
شكلي ُصعبت عليه ولا إيه
وإنتهى الإنترفيو بالجملة المعتادة"حنكلمك كمان أسبوعين وبالتوفيق بإذن الله"
أنا (في سري): شكلك طلعت منهم ياض أنت ياض
يمر أسبوع والتاني وألاقي أبويا طالع في إيده جواب من البوسطة مرسل ليا
غرييبة دي..هو أنا مين يعني حيبعتلي جوابات..وهو أصلا لسه فيه حد دلوقتي بيبعت جوابات في وجود الإيميل
خدت الظرف وفتحته على طول، لقيته من الشركة إياها اللي كنت عامل الإنترفيو فيها
بصراحة إتخدعت في الأول وافتركت نفسي اتزظفت وأنهم قبلوني بس على الطريقة القديمة أيام ما كانوا بيذيعوا أسماء الناجحين في الثانوية في الراديو وبالتالي يبقى ده جواب القوى العاملة اللي جاي لمايكل أفندي يعني
وبدأت في قراءة الجواب المنتظر ولقيتهم بيشكروني فيه على وقتي الثمين اللي ضيعته في مشاهدة طلعتهم البهية في إنترفيو المبيعات وبيتمنولي حظ سعيد في المرات القادمة ونشكركم على حسن تعاونكم معنا وإلى اللقاء في المسلسل القادم: حرب الجواسيس
يعني الموقف لا يحتاج لشرح لكمية الحسرة والفرسة اللي كنت فيها في الوقت ذاته خصوصا أني خارج مقتنع أوي بنفسي في الإنترفيو بعدما إكتسبت درجة عميد، فمبجرد ما إنتهيت من القراءة قطعت الجواب ولقيت مرفق به كتيب صغنن عن نشاط الشركة، فتعاملت معاه بمنتهى التحضر عند البوتاجاز وحرقته
مكنش ناقص غير قناة الحظيرة تيجي تصورني في المشهد الدرامي المؤثر ده
عموما كويس أن مفيش غير إنترفيو واحد هو اللي اتعملي ع البوسطة وإلا كان زماني بسمع رائعة الفنانة الراحلة رجاء عبده: البوسطجية إشتكوا من كتر إنترفيوهاتي
:نلتقي في الحلقة القادمة مع
إنترفيو السيارات..وإستعادة الذكريات

!!إنترفيو الجنان..وحمام التان

أهلا بكم..والحلقة ال36 من مسلسل مغامراتي في إنترفيوهاتي حيث نرى كل ما هو جديد وغريب في عمر إنترفيوهاتي المديد.
تمت أحداث هذه المغامرة في أغسطس 2009

فاكرين قصة العميد لما راح شركة المناديل إياها وكان خلاص فاضله فسوة ويمضي العقد عشان يشتغل هناك لولا أنهم إكتشفوا فيه السر الخطير وهو عدم وجود أي نشاط كنسي له، وبالتالي أخدت إستمارة 6 من هناك..هاللوليا
لمزيد من التفاصيل راجعوا الحلقة الرابعة لأنها مدخل لحلقة اليوم
http://strugglingmichealitoo.blogspot.com/2009/04/blog-post_16.html
المهم لفت الأيام والسنين ولقيت الزميلة العزيزة إيمي بتكلمني وتقولي أن فيه فرصة شغل ليا في الشركة إياها وأنهم دلوقتي محتاجين ناس، فحكيتلها الحكاية القديمة معاهم
البنت طمنتني وقالتلي أن زميلها محمود حمدي يعرف حد هناك وهو اللي مدخله يتدرب في شركة بيبسي اللي جنبها في 6 أكتوبر.
فطلبت منها مهلة لحد نهاية الأسبوع يكون بان موضوع الإستمارة اللي مليتها تبع إختبار قناة (سيما) للمعلقين الرياضيين
ولكن بكل أسف طلعت نصباية كبيرة بس عادي مفيش مشاكل..أنا متعلم عليا كتييييييييير
كلمت إيمي تاني ومنها خدت نمرة محمود اللي كل علاقتي به كانت فيسبوكية ونفسي أشوفه
الولد بصراحة ذوق جدا، وقاللي" يا مايكل ده فيه فرص تمرين هناك كتير "
فرديت عليه وقلتله" يا حودة أنا العميد..فرص تمرين دي مش وقتها بالنسبة لي..أنا عاوز شغل يعني فلوس من الاخر لأني خريج قديم من 4 سنين إنما أنت بتدرس والتمرين يفيدك جدا دلوقتي عشان الخبرة لما تتخرج"
الولد تفهم الموضوع وقاللي أنه حيكلم المصدر بتاعه في الشركة إياها عشان يشوفلي شغل مش تمرين..عداك العيب يا حودة
المهم حودة كلمني وقاللي خلاص هو وعد أنه حيشوفلك فرصة شغل هناك وحددنا يوم عشان نتقابل فيه ونروح الشركة دي
طبعا أنا رايح هناك ومش بفكر طول السكة غير في الأخ بيتر اللي قرفني بأسئلته الغبية والأم تريزا اللي حواجبها اترفعت لما عرفت أني مش عضو في كورال ترانيم ولا طلعت رحلات مع الكنيسة
بس عمال أطمن نفسي وأقول المرة دي فيه واسطة..هع هع هع
بعد مشوار طويل من وسط البلد لأكتوبر في رطوبة أغسطس وصلت لبيبسي عشان أقابل محمود وأطلع معاه ع الشركة إياها اللي فيها الراجل المنقذ(الواسطة)..واستنيت محمود هناك حوالي ربع ساعة قلت أتشمس فيهم شوية
وبعدها ركبنا عربية نص نقل ووصلنا للمكان الموعود ورفضوا يدخلونا غير لما واسطتنا يشرف
اللذيذ أن رغم أن محمود كان مكلم الأخ الوسيط ده إلا أنه لطعنا ع الباب أكثر من نصف ساعة قعدت أتكلم فيهم مع محمود شوية وأنا بقوله "يا حودة أنا كده مش مطمن..أنا حاسس أني النهاردة حزود حلقات مغامراتي في إنترفيوهاتي اللي أنت بتشوفها ع الفيس"
الولد قعد يطمني وأنا واقف جنبه عامل زي البطاطسية اللي لسه خارجة من طاسة الزيت
يوميها فعلا قدرت أن حصول بعض البنات على البشرة البرونزاج ليس بالأمر الهين..ده التان طلع مشكلة يا جدعان
وأخييييييييرا..أهو جه يا ولاد أهو جه يا ولاد..حضر الواسطة
راجل بصراحة شكله مريب..دخلنا جوه عند بتوع الأمن وقالنا استنوا شوية
وبعد فاصل ربع ساعة..جه الراجل التاني وخدني معاه لجوه وقاللي اطلع هناك لبتوع الhr
سألته:طب أقولهم إيه
قاللي:هما عارفين
دخلت المبنى فعلا..وقلت للبنت اللي قاعدة هناك :أنا جاي من طرف فلان(الواسطة)
قالتللي: مين ده..ده بيشتغل هنا؟
اه..قلتلها اه هو في الشركة..جايز يكون في إدارة تانية
قالتلي:بصراحة مفيش حد هنا بالإسم ده خالص
واااااااااااااااااااك وااااااااااااااااااااك واااااااااااااااااااك(موسيقى تصويرية كارتونية في لحظة إشتغالية)
طبعا أنا بقيت واقف قدامها فعلا مش عارف أقول إيه خصوصا أن البيه قفل موبايله وأنا بحاول أكلمه
والله يا جماعة إفتكرت مشهد هنيدي في إسماعيلية رايح جاي وهو بيذاكر عند أمه مع محمد فؤاد وفي الاخر لما الست قامت من سريرها منكوشة:هنيدي جري وقال"مين دي يا هيما"
البنت قالتلي:مفيش مشاكل..أنت مش جاي تقدم السي في بتاعتك
انكبست وقلتلها: اه..حعمل ايه يعني في موقف زي ده
قالتلي: طب خش الأوضة جوه واملى الاستمارة دي
طبعا دخلت نفس المكان اللي رحته في 2007 وقعدت املى في استمارة كئيبة حوالي 6 أوراق وطبعا بما أنها مش المرة الأولى ليا في عالم الإنترفيوهات، وبما أني حالف يمين طلاق من الست اللي عمري ما حتجوزها أني مش حعمل إنترفيوهات سخيفة تاني..فلكم أن تتخليوا الحالة العصبية اللي كنت فيها وأنا بملى الإستمارة
ومفيش ربع ساعة ولقيت مين يا حلوين داخل عليا الأوضة
بيييييتر..هوووووو بعينه بغباوته بوشه العكر
أنا أول ما شفته كان القلم حيتكسر في إيدي وأنا بكتب والواحد جاتله حالة أكلان غريبة في الأنف(والحدق يفهم)
خلصت الإستمارة ودخلت هناك للحظة الإنترفيو وأنا بحاول أتماسك أعصابي من المقلب اللي شاربه من أول اليوم وخايف لبيتر هو اللي يعملي الإنترفيو كلاكيت تاني مرة
ولكن نزلت عدالة السماء في المكان للحظات والبنت اللي ادتني الإستمارة هي اللي عملتلي الإنترفيو..وأنا بما أني من النوع الحونين، فبالتالي هي مالهاش ذنب في اللي حصل بيني وبين بيتر في 2007..احم احم
الطريف أنه في خلال ثواني لاحظت أن كل المكاتب اللي في الأوضة عليها صور دينية مسيحية..أنا قلتها حكمة في 2007:دول لما الواحد يدخل عليهم ما يقولش صباح الخير..يقول كيرياليسون وينجز
عموما هو كان أسرع إنترفيو عملته في حياتي
يدوب هي بصت في الإستمارة وسألتني: أنت سبت اخر شغلانة ليك ليه في راديو حريتنا
قلتلها: بصراحة عشان مكنش فيها فلوس
قالتلي:عاوز تشتغل إيه هنا؟
قلتلها:hr
قالتلي: طب أنت مش عارف أن المجال ده يتطلب خبرة
قلتلها:عارف بس أنا درستها وحاولت اشتغل فيها بعد التخرج بس محصلش نصيب(وبعدين ما أنا خبرة في الإنترفيوهات يا انسه..ولا ده مش كفاية يعني)
قالتلي: طب هو دلوقتي السي في بتاعتك دخلت الdata baseعندنا ونبقى نكلمك لو فيه حاجة كمان أسبوعين
أنا(في سري): أهلا بيكي في وطنك
خرجت لقيت حودة مستنيني وفهمته اللي حصل مع الأخ اللي سابني وفلسع ورماني في ظلمات الإنترفيو وحدي
لقيت حودة قاللي:معلش أهو اديك زودت حلقة في مسلسل الإنترفيوهات
قلتله: الله يسامحك يا حودة..يعني ده أنا في عز ما كنت متخرج عمري ما ضربت مشوار زي ده عشان أقدم سي في..أنا يوم ما كنت أضرب مشوار زي ده كنت أبقى مطلوب في إنترفيو بكرامتي
المهم ركبت معاه وروحنا وأنا ساكت طول السكة وقرفان أني دخلت المكان ده تاني
يلا عموما أديني أوفيت بالوعد وكتبت الحلقة يا حودة وطلعتك معايا في دور بطولة مشتركة
:نلتقي في الحلقة القادمة
إنترفيو ع البوسطة

!!إمتحان المقالب..وفوز الزمالك

أهلا بكم..موعدنا الان مع الحلقة ال35 من مسلسل "مغامراتي في إنترفيوهاتي" وأنا بشكر اللي قادرين يتابعوا المسلسل ده من الحلقة الأولى لحد النهاردة وحتى اللي دخلوا معانا في النص وبالمناسبة دي أحب أشكر سواق التاكسي اللي وصلني في الانترفيوهات دي كلها وطبعا سواقين السرفيس والتكاتك وعفاريت الأسفلت وسمعني أحلى سلام: يا أم المتضايق سبت الشغل عشر مرات
تمت أحداث هذه المغامرة في مايو 2007
طبعا عرفتوا خلاص من خلال الحلقات اللي فاتت أني راجل دماغي كروية بحتة وأني حاليا بدور في مجال الإعلام الرياضي..بس يا ترى العلاقة بالكورة واخدة شكل مختلف شوية عندي..ده اللي حنعرفه دلوقتي
في أبريل 2007 بدأت أمر بمرحلة كساد في الإنترفيوهات..يعني مفيش كل شوية تليفون وأنزل يا مايكل إنترفيو وأنتوا عارفين أني مدمن إنترفيوهات من 2005 وبالتالي لكم أن تتخيلوا فترة الكساد دي عاملة ازاي
يعني يدوب إنترفيو كل أسبوعين أو 10 أيام أرجع منهم شاري السي دي الشهير"حنكلمك كمان أسبوعين" وقعدت أسبوعين من غير رنة موبايل حتى..ينفع كده؟
لحد ما جالي تليفون من بنك اتش اس بي سي الشهير فرع الزمالك
HSBC
وقالولي يا مايكل عندك إمتحان مدته 3 ساعات يوم 21 مايو من الساعة 3 ل6
أووووووووبا..ايه ده..يوم 21 مايو ده موافق لقاء القمة بين الأهلي والزمالك في الدور الثاني اللي حيبقى الساعة 5..وبعدين أعمل ايه في الورطة دي
قعدت حسبت نظرية الإحتمالات وهي أن البنك ده راحه 4 صحابي قبل كده عملوا الامتحان فيه ولم ينجح مهم أحد رغم أنهم ال4 أحسن مني ومنهم 2 قسم إقتصاد كمان+ أن الوحيد اللي أعرفه دخل البنك ده دخله بكوسة كبيرة وبما أني عمري ما فوت ماتش قمة ومقدرش أكون موجود في مكان تاني في نفس التوقيت لأني ححس ساعتها أني قاعد على قرن فلفل حراق
يبقى المعادلة يتقول س+ص=اقعد اتفرج يا مايكل ع الماتش وبلاها الامتحان المعفرت ده
المهم فضلت بفكر ع الحال ده يومين وخلاص فاضل يوم ع الامتحان وانا لم اتصل للإعتذار بالبنك رغم أني عارف أن الأهلي حسم الدوري وحينزل الماتش ده بالصف الثاني
وفجأة..تحدث صدفة نادرا ما بتتكرر في حياتي..اتحاد الكورة مشكورا يقرر تأجيل موعد المباراة للساعة 8
هييييييييييييييييييييه..خلاص..فرجت نروح نمتحن وبعدين أتفرج على مباراة الأهلي وشقيقي الزمالك
اه متستغربوش أصلي بتفرج على الزمالك دايما وبحس أني لو كان ليا أخ توأم كان حيبقى اسمه زمالك
أنا والزمالك بينا حاجات كتير متشابهة..يكفي أننا بدانا خيبتنا في نفس التوقيت ولازلنا مش عارفين نخرج من الدوامة حتى الان..يعني كل ما يتقال عودة الزمالك واتصلح حاله بيخيب تاني
لمزيد من التفاصيل..اقروا في البوست ده أوجه الشبه بيني وبين نادي الزمالك الشقيق
http://strugglingmichealitoo.blogspot.com/2009/02/blog-post_22.html
راح العميد للإمتحان في ميعاده..مكان فخم جدا الصراحة وأول ما دخلت قاعة الامتحان البنت اللي في الموارد البشرية علقت مننا كلنا الموبايلات بإعتبار أنه ممنوع نستخدم أي حاسب الي وإعتمادنا على مخنا وبس..أول القصيدة
جالي إمتحان عبارة عن رزمة ورق فيها كل اللي قلبكم يحبه..انجليزي تلاقي- اختبار ذكاء-منطق-رياضيات-معلومات عامة-استمارة بيانات شخصية
بدأت باللي ليا فيه وهو الإنجليزي وحليته بعد وقت طويل وبعدين دخلت على الذكاء..الخ لحد ما وصلت للجزء بتاع الرياضيات لقيت معظمه أشكال هندسية وعليها أسئلة أقسم بالله ما فاهم ايه المطلوب مني فيها
وبعدين أنا شايف الأشكال دي جواها شوية شخابيط عيل أهبل وخلاص..حطلع منها ايه بس
قعدت أبص وأفحص واتمحص واقلب الورقة بالشقلوب يمكن يكون في الأمر خدعة..مفيش فايدة
يلا عموما قلت أنا كده عملت اللي عليا وحاولت على قد ما أقدر وهي مش مكتوبة هنا..فرحت اكتفيت بهذا القدر ومشيت خصوصا أن الوقت كان فاضل عليه يدوب عشر دقائق.
وكانت المفاجأة أول ما استلمت الموبايل من البنت اللي في الموراد البشرية لقيت 4 ميسد كول بنمرتين جداد
بصراحة مش عارف أوصف شعوري ساعتها: هل أروح أقول للبنت: إيدك أبوسها يا طاهرة ولا أقول ايه الحظ الغبي ده..يعني أول ما الموبايل ينط من إيدي الشركات تبتدي تتصل بيا وامتى وأنا بمتحن في بنك؟؟؟
استنجتت من خلال النمرتين دول أن النهاردة شقيقي الزملك حيكسب الأهلي 2-صفر علما بأن الزمالك من 2004 مكسبش الأهلي خالص..بس أهو قلب الأم بقى ده غير أن الأهلي كان مريح 10 لاعيبة دفعة واحدة
وفعلا كسب الزمالك يوميها ( ومن بعديها مكسبش خالص..هع هع) 2-صفر
المهم لقيت أن فيه نمرة متصلة بيا 3 مرات ونمرة مرة واحدة
قلت :أما ألحق أجرب بتوع ال3 مرات اللي ملهوفين عليا كده يمكن يكونوا لسه مروحوش وفعلا ردت عليا واحدة قالتلي اتكلم بكره عشان الكل مشي دلوقتي
ولما إتصلت تاني يوم: ردت عليا واحدة قالتلي: احنا اتصلنا بيك 3 مرات ومردتش وبالتالي خلاص بنشوف غيرك
شرحتلها أن كان فيه ظروف إمتحان وكده بدليل أني اتصلت بيهم بعدها على طول ولكن لا حياة لمن تنادي..عموما مش أول مرة يحصل فيا الموقف ده..راجع الحلقة التاسعة
http://strugglingmichealitoo.blogspot.com/2009/05/blog-post_15.html
حاولت مع النمرة التانية اللي كانت اتصلت مرة واحدة وردت عليا واحدة قالتلي احنا متصلناش بحد
قلتلها: ما هي نمرتكوا عندي..قالتلي استنى اشوف حد من الموارد البشرية يبقى يكلمك عشان مش عارفة حاجة
وهنا كانت التنفيضة الثانية
ربنا يخلي الاتش اس بي سي ويخليه لأمه
فعلا أنا لو كنت حتجوز كنت حخلف ولد واسميه اتش ولو بنت حسميها اس
:كان معكم العميد"إم"..وإلي اللقاء في الحلقة القادمة
إنترفيو الجنان..وحمام التان

الألبون العاشر:خلي الدماغ صاحي

بووووووم..بووووووووم
العميد يحييكم من شركة جحش فون للإفتكاسات الفنية اللوزعية ويسرنا أن نقدم لحضراتكم عاشر ألبوناتنا بعنوان"خلي الدماغ صاحي"، وهذا بعد النجاح الساحق الماحق لألبون العيد "غني يا عميد"
http://strugglingmichealitoo.blogspot.com/2009/09/blog-post_8179.html
المرة دي معانا وجوه جديدة حنسمعها لأول مرة زي المطرب الكبير علي الجعار في رائعة ذئاب الجبل وإيهاب تخنيق وشفيق جلال في ريا وسكينة بالإضافة لمفاجأة شادية للمسئول الكبير في إهداء خاص.
الالبون ببساطة بيطرح سؤال مهم:هل المكيفات هي السجاير والمخدرات بس وايه الحل..هع هع
زي ما أنتوا عارفين..كل واحدة/واحد حيختار أكتر أغنية عجبته وأكتر كوبليه شده
اتفضلوا معانا

الأولى:كيك وبوكس(اه ونص) للمطربة الجميلة نوسة عجرم وبتحكي عن قصة واقعية لفتاة بتلعب كيك بوكس وخطيبها مش موافق على أساس أنه شايفها رياضة غير أنثوية
وده نص الموضوع اللي سبق نشره مع بعض التعديلات في الأغنية
http://strugglingmichealitoo.blogspot.com/2008/11/blog-post_23.html

مفيش حاجة فيها كده اهدى حبيبي كده..واعقل زي زمان
يا ابني اسمعني..حتكدرني..إيدي طارشة كمان
حبيبي قرب..بص وبص..زعلان..ازعل طز طز
لحسن حضرب..حضرب كيك وبوكس وحتبقى أنت أكيد خسران
ليه ده كل ده..كبرت علي كده..أنت مبتفهمش كلام
تعبت يانا يانا..تقولش جربانة..اهدى بقى وكفاية جنان
حبيبي قرب..بص وبص..زعلان..ازعل طز طز
لحسن حضرب..حضرب كيك وبوكس وحتبقى أنت أكيد خسران
مفيش حاجة فيها كده اهدى حبيبي كده..واعقل زي زمان
يا ابني اسمعني..حتكدرني..إيدي طارشة كمان
دي حاجة معجزة..اكمني مرعبة..مستهيفاك وبقالي كتير
حبيبي شوف أنا..ضربت كام قفا..قلت برضه عليا غفير؟
حبيبي قرب..بص وبص..زعلان..ازعل طز طز
لحسن حضرب..حضرب كيك وبوكس وحتبقى أنت أكيد خسران
مفيش حاجة فيها كده اهدى حبيبي كده..واعقل زي زمان
يا ابني اسمعني..حتكدرني..إيدي طارشة كمان

الثانية:متحسبوش يا شباب(متحسبوش يا بنات) لفرقة هاني شنودة وحنشوف فيها حوار بين الشباب العاطل الضايع وكبار المسئولين..كلام الشوباب حتلاقوه بالأحمر

متحسبوش يا شباب أن الحشيش راحة
ومتزعولش يا شباب إن قلنا بصراحة
شرب الحشيش عمره..عمره ما كان راحة
قولولنا يا شطار..مين في الحياة مرتاح
تلقي الشباب اللي ضايع..عنده تعب في الدماغ
حلم الوظيفة الغتيت..بالواسطة يهرب أكيد
ف القهوة يقعد بعيد..علي شيشة بالتفاح
ومهما نتعب نقول..شرب الحشيش راحة
متحسبوش يا شباب أن الحشيش راحة
ومتزعولش يا شباب إن قلنا بصراحة
شرب الحشيش عمره..عمره ما كان راحة
مهما تقولولنا ده إيه..نفسنا رايحة إليه
واللي يشوف م الغباوة..لابد ينسي يا بيه
لابد من أخد تار أو حتي نشرب سيجار
ولما يجوا الكبار..يقولوا كده أوكيييييه
ومهما نتعب نقول..شرب الحشيش راحة
متحسبوش يا شباب أن الحشيش راحة
ومتزعولش يا شباب إن قلنا بصراحة
شرب الحشيش عمره..عمره ما كان راحة
عارفييييييين

الثالثة:ذئاب الجبل لعلي الجعار ودي أغنية بنفس اللهجة الصعيدية إهداء للحكومة المصرية
اللي فشلت في التعامل مع مشكلة الزبالة وسلمولي ع الشركة الأجنبية
ده لينك الأغنية عموما
http://www.4shared.com/file/51519398/7297fd0e/___.html?s=1

رموا علينا زبالة..واحنا يا ناس لمامة
يا حكومة قومي ولمي..فضايحنا ف القمامة
ده لكل بيت نفاية..ليها ريحة حكاية
لا تشيلها ف النهاية..ولا ترميها بخرابة
هما اللي وسخوها..هما اللي بيقرفونا
وقال يجيبوا لجنة..وهما اللي إستكردونا
قرفان من الأذية..كيف همي يبقى ديا
ضاق البلد عليا..أنا ليه حمال أسية
ماترد عليا يابا
رموا علينا زبالة..واحنا يا ناس لمامة
يا حكومة قومي ولمي..فضايحنا ف القمامة
هما اللي عذبوني..هما اللي بهدلوني
وكل ما ألاقي قوتي..عن قوتي يفرقوني
أنا ف الكوربة ساكن..والطفح ف بيتي ماكن
شامم فيها الزرايب..حقي ضايع ولكن
بكره يرجعلي يابا
ده لكل شيء حكاية..فيها شركة وغاية
لا تشيلها ف النهاية..ولا ترميها بخرااااااابة
رموا علينا زبالة..واحنا يا ناس لمامة
يا حكومة قومي ولمي..فضايحنا ف القمامة
فضايحنا ف القمامة..فضايحنا ف القماااامة

الرابعة:تررم لمحمود العسيلي وفيها لخصنا مشكلة نادي التررم(الزمالك) الحالية ومعاناة أنصاره

كان فيه فرقة إسمها التررم..نتايجها مش طبيعية
كل ما أجي وأشوفها..قلبي يبقى في رجليا
تعبانة ومدوخانا ونتايجها مش عجبانا
بتقرفنا وبنقول تعملوا كده ليه
كنا نشجع بحرارة..تكسفنا بكل حقارة..نفسنا نعرف سرها إيه
الأنانية والغباوة والشللية والدناوة..والسذاجة والرزالة..دي عصابة ايه يا حلاوة
كل الناس اللي يروحوها يبقوا عاوزين يشفطوها
أو يروحوا يخربوها..على دماغ اللي جابوها
لو كانوا جابوا السير يدرب..كان لخبط وسوحنا
ونقعد برده نندب..ونفضل زي ما إحنا
حافظينها اه وعجنينها..ولسه مش فاهمينها
ونفضل نقول يا زمالك ليه
ولا لو جيبنا كاكا..تكسفنا بكل حقارة..نفسنا نعرف سرها إيه
الأنانية والغباوة والشللية والدناوة..والسذاجة والرزالة..دي عصابة ايه يا حلاوة
كل الناس اللي يروحوها يبقوا عاوزين يشفطوها
أو يروحوا يخربوها..على دماغ اللي جابوها

الخامسة:الأفلام الحلوة(الأيام الحلوة) لإيهاب تخنيق وتدور أحداثها في قالب من الفانتازيا حول رجل عجوز مش عحباه أحوال السينما سنة 2050 لأنه بيحن لجيل هيفا وهبي وسعد الصغير واللمبي

الأفلام الحلوة..الأفلام الحلوة
بترجع زماااااااااني
الأفلام الحلوة..الأفلام الحلوة
مبترجعش تااااااني
شكل الفيلم يحير..معنى السينما إتغير
أكبر خلطة رقص وهز وضحك..وسعد صغير
الواحد يتمرر..والفيلم بيتكرر
نقعد نندب نحلم نقلب..وعبطنا بيتصور
اللي نحبه بندلعه..واللي قارفنا بنفلسعه
للي ناسينا..شفتم دينا
واللي هارينا بنبلعه..بنبلعه..بنلعبه
ولا فيه شرب إزايز..ولا فيه دفع ضرايب
كله في هبلك عبطك فبرك..فيلمك دايما بايخ
شافوا اللمبي مسيب..كركر قالوا منيل
عمر ما فيلم بحب السيما..كانت حاجة بتتعيب
معنى الفيلم بنزيفه..شكل الفيلم بنشوهه
واللي قارفنا..هاتوا فلوسنا
واللي شاتمنا بنكرمه..بنكرمه بنكرمه
ماشية السينما ودايرة..فين أفلامك هيفا
ناس بمراتب ضايعة وناس بمراتب عالية وصايعة
ناس أفلامها عقيمة..وناس أفلامها غريبة
ناس كل ما أفلامها بتقدم..تأخد جزمة قديمة
بحب زماننا وفي فننا..بنتحاكى عن بعضنا
وإدي قصتنا..وإدي حكايتنا
وأدي سينمتنا أنت وأنا
أنت وأنا
أنت وأنا

السادسة:بنت الحارة لشفيق جلال والمشهورة بأفلام ريا وسكينة وبتدور أحداثها في غرزة لا مؤاخذة واحد راحها مع حبيبته واتفاجيء أنها طلعت خبرة في عالم المكيفات فحنشوف قال إيه

بنت الحارة يا بنت الحارة..حلفتك لفيلي سيجارة
حلفتك لفيلي سيجارة
شفتي الدوخة..شفتي الدوخة
ده حشيشها..مضروب اه يا حوسة
اه ياني منها اه ياني منها
كان نفسي..أضرب في خابورها
أضرب في خابورها
ليه ذلاني ليه ذلاني..بتلف ف الجوين التاني
الجوين التاني
والولاعة والولاعة وحبيبتي أجدع حشاشة
والولاعة والولاعة وحبيبتي أجدع حشاشة
أنا إيه جابني..أنا إيه جابني
لفتلي في زغروف اللمبي
لازم أراضيها لازم أراضيها
وأعمر في الشيشة ليها
بصوا عليها..بصوا عليها..بصوا عليها
بصوا عليها..بصوا عليها..بصوا عليها

السابعة:شوف على مهلك(سوق على مهلك) لشادية وكمال الشناوي وهي مهداة للطالب النجيب فاروق اللي سقط في الإمتحان وقال أن فيه مؤامرة عليه
http://new.mawaly.com/music/Shadia/track/2768

شوف على مهلك شوف..وحتخسر يا فاروق
شووووووف..شوف على مهلك شوف
على إيه تجري كفاية علينا..الناس اتقرفت..من بلاوينا
كان في إيدينا تحن علينا..وبعد حريقة..تروحلي مارينا
بكره الغلب اللي عايشناه..يكبر طول ما احنا بنخفيه
ياما حالانجي بمكره رعاه..وصرف ملايينه بتسفيه
لجنابك مصاريف بالكوم..ما هي سايبة على طول اليوم
شفنا هبلنا بنستناه..قالوا أمريكا كانت بيعاه
شوف على مهلك شوف..وحتخسر يا فاروق
شووووووف..شوف على مهلك شوف
شوف على مهلك وابقى اكدبلي..قول أمريكا ولوبي هباب
أنا ححلقلك وأنت ابعتلي..عن مصاريفك كشف حساب
لما تفكر..تبقى تقوللي
عمر ما كنا شعب حمار
والأوهام سلملي عليها
وهم بوهم وبإستمرار
طب شوف على مهلك شوف..وحتخسر يا فاروق
شووووووف..شوف على مهلك شوف

الثامنة:حجرين(قمرين) لعمرو دياب وفيها قصة واحد بيستعرض ذكرياته في العيادة النفسية حول عالم الكيف

والله دي دماغ وجعاني يا وله
حجرين..حجرين دايما والعين
عقلي بيتسلي عليك..في الغرزة كده شاربييين
يا قلبي يانا من حظي أنا..يا واد أمانة ما تقولي دولا حرام
اه يا غلبي..يا كل غلبي
سلمته ذقني واداني صنف تماااااااااام
والله دي دماغ وجعاني يا وله
حجرين..حجرين دايما والعين
عقلي بيتسلي عليك..في الغرزة كده شاربييين
زاد اشتغالي..فاكرك مزاجي
وأنا إيه جرالي..خلاني أموت بغباء
شربتك أنت..شميتك أنت..إزاي وإمتي
وسجنت روحي معااااااااك
والله دي دماغ وجعاني يا وله
حجرين..حجرين دايما والعين
حجرين دايما والعين
عقلي بيتسلي عليك..في الغرزة كده شاربين
معقولة أكون خفييييييييييت
والله دي دماغ وجعاني يا وله
والله دي دماغ وجعاني يا وله

التاسعة:اسمي تامر حسني(رسمي فهمي نظمي) للمطرب الكبير تيموز وفيها حنشوف مناقشة ساخنة بيت تيموز وإحدى الناس اللي كانوا معجبين به أول ما طلع

لووووولا..لووووولا
لولا الغبا..لولا الغبا ما كنت جيت لولا الغبا
بخيبتي جيت وبقولها بالعربي..عربييي
مسيطرة على حالي على فني..فنييييييي
وبقولها من صدري
لولا الغبا..لولا الغبا ما كنت جيت لولا الغبا
لخيبتي سبت..الجيش..من بدري..بدريييي
علشان أعبر ليكوا عن ضعفي..ضعفييييي
اه..جدا على غلبي
أنا غنيت واتدبيت وبقيت ولا أجدع قرش حشيش
كذا مرة حاولت أربي في شعري..وصدري مبيخونيش
وأنا نفسي أروحلك..ألف حفلة ولكن ما بيديش
لا أنا جاي أسمع علامة ولا..ولا أنت إيهاب توفيق
وحعاتبك أنا من غير نفسنة..وبقينا احنا الاتنين
احنا الاتنين محابيس يا عيني
لولا الغبا..لولا الغبا..وريكوا فني ردح وغبا
وبرضه ببقى..ببقى ليه عصبي..عصبيييييي
انا جاي أوضح ليكوا أهو عبطي..عبطييييي
للدنيا من قبلي..قرفتك
لولا الغبا..لولا الغبا..ولا يوم بقيت لولا الغبا
وقبل ما يخلص من الغنا صوتي..صوتييييي
بكتب غناوي..وكسرت فيلمي..فيلمييييييييي
وضحكت من دمي..يا خفة
لولا الغبا..لولا الغبا..معقولة أنتي اللي تشكري..في جمالي وفي شعري..وكمان صدري..صدرييييييي
ده أنا اللي دايب اسمي تامر.. حسنييييي..وعاكسييييي..وشاوري لو تحبي
أنا غنيت واتدبيت وبقيت ولا أجدع قرش حشيش
كذا مرة حاولت أربي في شعري..وصدري مبيخونيش
وأنا نفسي أروحلك ألف حفلة ولكن ما بيديش
لا أنا جاي أسمع علامة ولا..ولا أنت إيهاب توفيق
وحعاتبك أنا من غير نفسنة
وبقينا احنا الاتنين..احنا الاتنين محابيس يا عيني
لووووولا..لووووولا
كرهتك..كرهتك

العاشرة:سيجارة(خسارة) للعندليب عبد الحليم أبو حافظ وفيها قصة زوج ضيع كل فلوسه ع السجاير وأصدقاء السوء فحنشوف نهايته مع زوجته سارة(عن قصة واقعية) برضه

سيجارة سيجارة..فهمتك يا سارة..سيجارة سيجارة..فهمتك يا سارة
كبستي وقفلتي ع الشيشة الحجارة..كبستي وقفلتي ع الشيشة الحجارة
سيجارة سيجارة فهمتك يا سارة..خسارة
يوماتي ليلاتي بدور عليها..اتاري دماغي..بتنده عليها
صحابي سكاري..عيوني حزاني
كبستي وقفلتي ع الشيشة الحجارة..كبستي وقفلتي ع الشيشة الحجارة
سيجارة سيجارة..فهمتك يا سارة..خسارة
ده ذنب اللي يشمك ويدوخ..فين يهرب من سحرك و يروح
علي أقرب بار يتقندل..ولا قادر يوم يتعلم
عليت بإصطباحة..وشمة وسيجارة
كبستي وقفلتي ع الشيشة الحجارة..كبستي وقفلتي ع الشيشة الحجارة
سيجارة سيجارة فهمتك يا سارة..خسارة
يا شامم تعالي..نسايبي فاتوني..بهجري وقضايا..وضاعت فلوسي
ما بين نصح سارة اه..وبين زن ماما اه
كبستي وقفلتي ع الشيشة الحجارة..كبستي وقفلتي ع الشيشة الحجارة
سيجارة سيجارة فهمتك يا سارة..خسارة

إلى اللقاء مع الألبون القادم في نوفمبر المقبل
:نلتقي في الحلقة المقبلة مع الحلقة ال35 من مسلسل مغامراتي في إنترفيوهاتي
إمتحان المقالب..وفوز الزمالك